Новата S класа ќе има шест деривати

Првиот човек на Daimler, Дитер Цече, на отворањето на новата фабрика во Кечкемет лично потврди дека според стратегијата за развој на компанијата до 2020 година, Mercedes од новата S класа наместо три како сега, ќе извлече шест деривати.

Тоа значи дека освен лимузините со нормално и продолжено меѓуоскино растојание и CL класата, која во иднина ќе биде именувана како купе верзија на S класата, моделот кој се развива под кодната ознака W222 ќе биде основа и за замената на Maybach (која засега се нарекува Pullman), како и за два големи кабриолета со четири места и две и четири врати, направени според идејата на концептот Ocean Drive, прикажан уште во 2007 година.
Идната S класа ќе биде понудена со широк дијапазон мотори - освен за олку голем и луксузен автомобил очекуваните V6, V8 и V12 мотори, и со 2,2 литарски четирицилиндричен дизел мотор, кој, како и во хибридните варијанти на Е класата, заедно со 3,5 литарскиот бензински V6 мотор ќе биде основа и за стандардните и plug-in хибридни варијанти. Конечниот изглед на новиот модел и натаму е голема тајна, но се очекува новата S класа да наликува на концептот F700, покажан исто така во 2007 година.
И покрај годините, S класата сé уште добро се продава - скоро исто колку и серијата 7 на BMW и четири пати повеќе од Audi A8. Во моментов најстариот модел во гамата на Mercedes, големата S класа, ќе го дочека својот наследник на крајот на оваа или почетокот на идната година.