Пристигна и 4x4 верзијата на Panda

Во пресрет на салонот на автомобилите во Париз, Fiat ги објави првите податоци за Panda 4x4.

Малиот теренец како единствен во својата класа живее веќе триесет години и за тоа време има стекнато мала, но доста верна публика, која Fiat се потруди да не ја разочара и со неговата трета генерација. Долга само 3,68 метри, Panda 4x4 ќе се разликува од нормалната верзија по изменетото ослонување, поголемото растојание од подлогата и поробусниот изглед добиен со пластичните заштити на каросеријата и новите предни и задни браници, како и по неколкуте декоративни елементи во внатрешноста и специфичната колорна шема. Погонот на сите тркала електронски се контролира во зависност од условите на патот, а ESC системот за контрола на стабилноста располага и со ELD (Electronic Locking Differential) функција. Panda 4x4 ќе биде понудена со 0,9 литарскиот TwinAir двоцилиндричен турбо мотор со 85 KS и 1,3 литарскиот MultiJet дизел со 75 KS, и двата стандардно опремени со старт-стоп систем и шестстепена трансмисија со скратен прв степен.
Како дополнување на гамата, Fiat ќе ја понуди и Trekking верзијата на Panda, во која ќе бидат искомбинирани теренскиот изглед на Panda 4x4 и со систем за контрола на тракцијата подобрената механика од обичната Panda со погон само на предните тркала. И не само тоа - понудата на Panda ќе биде збогатена и со нејзината Natural Power верзија, чиј 80-коњски TwinAir мотор како погонско гориво користи метан.

поврзани вести:
Fiat привршува со развојот на Panda 4x4