Електричната верзија на Spark подготвена за производство

Најавен лани, Spark EV, благодарение на зголемениот ангажман на General Motors на полето на алтернативната погонска енергија, ќе започне да се продава налето идната година.

За овој мал градски еко-автомобил, GM истакнува две особености - Chevrolet Spark EV е првиот автомобил чија електро погонска група (која 75% е позајмена од Volt и хибридните пик-апи на GM) е комплетно американска, како и тоа дека електричните компоненти, кои имаат декларирана моќност од 110 kW и дури 542 Nm, му овозможуваат забрзување од 0 до 100 km/h за помалку од 8 секунди. Во она што е објавено (спецификациите на овој plug-in модел сé уште не се во целост обелоденети) се потенцира уште и дека литиум-јонските батерии со капацитет од 20-тина kWh, тешки 254 kg, се тестирани лабораториски 200.000 часа, заради што и GM им дава гаранција од 8 години или 100.000 милји. За нивно полнење на 240 V потребни се помалку од седум часа, но имаат можност и за брзо полнење до 80% капацитет за 20-тина минути.
Цената на Spark EV ќе изнесува 25.000 долари, со вклучени државни бенефиции.

поврзани вести:
Opel се откажа од електричната верзија на Adam